El mio averamientu al mundiu la gaita foi gracies a la mio tía materna, Mª del Rosario, que taba daquella yendo a clases de gaita nel pueblu de mio ma, Suares, nel conceyu Bimenes. Animóme ella a dir a clas de gaita con Eugenio Otero (ex-direutor de la Banda Gaites Llariegu). Yera por marzu de 1994. Pa la mio suerte la mio "rellación" cola gaita sigue y aspero que seya por munchu tiempu.
D' Eugenio deprendí a ser disciplinau y a tomame' n seriu l' oficiu de gaiteru. ¿Oficiu? Sí. Pue vese qu' el nome col que se conoz a tocaores d' un istrumentu musical ye l' aunión del nome de l' istrumentu que toquen y el sufixu -ista: pianu>pianista ; flauta > flautista ; etc.
Per otru llau panaderu, inxenieru, fontaneru, etc, acaben col sufixu -eru, lo mesmo que gaiteru.
Ser gaiteru nun ye solo tocar la gaita. Ye daqué más.
Tamién fui a clases de Chus Solís, qu' enseñóme a tocar pa baille asturianu y col que fice la mio primera actuación n'una banda gaites.
De caberu mayestru tuvi a Xuacu Amieva, col que meyoré la mio téunica y col que deprendí que "nun por tocar más acelerao toques meyor".
Nun quixera escaeceme de Xuan Rodríguez, gaiteru de Llan de Cubel, nin de la Banda Gaites Rei Aurelio (Samartín del Rei Aurelio) porque ensin ellos la mio carrera como gaiteru nun sedría la mesma. Gracies por tou.
No tocante a concursos representé a Asturies na Final Nacional de los Premios Veo-Veo nel añu 2000, tres ser el primer clasificau na Final Rexonal xuntu' l grupu de ximnasia Olympia, de Xixón.
Nos concursos de gaita los mios resultaos móstrense darreu:
| Concursu | Añu | Puestu |
| I Concursu de Gaiteros Mozos de Bimenes | 2000 | 2u |
| I Concursu de Xóvenes Gaiteros d' El Carbayu | 2000 | 3u |
| XIV Memorial Remis Ovalle (Uviéu) | 2001 | 6u |
| I Concursu de Gaita de Lantero (Samartín del Rei Aurelio) | 2001 | 4u |
| I Concursu Gaiteru Lliberdón | 2001 | 1u |
| II Concursu de Xóvenes Gaiteros d' El Carbayu | 2001 | 3u |
| II Concursu Gaiteru Lliberdón | 2002 | 1u |
| III Concursu de Xóvenes Gaiteros d' El Carbayu | 2002 | 1u |
| XVI Memorial Remis Ovalle (Uviéu) | 2003 | 4u |
| IV Concursu de Gaiteros Mozos de Bimenes | 2003 | 3u |
| XVIII Troféu Macallan de Gaita (Lorient) | 2003 | 3u |
| II Concursu de Gaita de La Nueva (Llangréu) | 2004 | 2u |
| II Concursu de Gaita de Mieres | 2004 | 2u |
| XII Concursu y Muestra de Folclor "Ciudá d' Uviéu" | 2004 | 4u |
| XVII Memorial Remis Ovalle (Uviéu) | 2004 | 1u |
| XIX Troféu MacCrimmon de Gaita (Lorient) | 2004 | 4u |
| I Concursu de Gaita de Llaviana | 2004 | 5u |
| XIII Concursu y Muestra de Folclor "Ciudá d' Uviéu" | 2005 | 5u |
| XVIII Memorial Remis Ovalle (Uviéu) | 2005 | 4u |
| XX Troféu MacCrimmon de Gaita (Lorient) | 2005 | 4u |
| XIX Memorial Remis Ovalle (Uviéu) | 2006 | 4u |
| XXI Troféu MacCrimmon de Gaita (Lorient) | 2006 | 2u |
| XX Memorial Remis Ovalle (Uviéu) | 2007 | 5u |
| XXI Memorial Remis Ovalle (Uviéu) | 2008 | 5u |
| VII Troféu de Gaites Noega (Xixón) | 2009 | 3u |
| VIII Troféu de Gaites Noega (Xixón) | 2010 | 1u |
Xuntu col mio hermanu Carlos (al tambor), algamamos estos resultaos:
| Concursu | Añu | Puestu |
| I Troféu Hermanos Cueli (Vidiago) | 2007 | 4u |
| VI Troféu de Gaites Noega (Xixón) | 2008 | 3u |
| II Troféu Hermanos Cueli (Vidiago) | 2008 | 1u |
| VII Troféu de Gaites Noega (Xixón) | 2009 | 3u |
| III Troféu Hermanos Cueli (Vidiago) | 2009 | 1u |
| VIII Troféu de Gaites Noega (Xixón) | 2010 | 1u |
Nel añu 2011 nominenme como Meyor Gaiteru nos PREMIOS AMAS 2011, pola mio carrera como gaiteru.
No hay comentarios:
Publicar un comentario