Campeón de Asturias. Periódicu "Les Noticies", 4 de xunetu de 2004

"Gústame mirar al pasáu y deprender los veteranos"

El mozu gaiteru d' El Berrón (Siero) ganó esti añu' l Memorial Remis Ovalle

Jorge Suárez Carbajal ganaba hai unos díes el Troféu Memorial Remis Ovalle pa gaiteros solites. Va a ser el nuestru másimu aspirante al Troféu Macallan, que se va a celebrar nel Festival Intercélticu de Lorient el prósimu sábadu día 31 na segunda xornada d' esti certame bretón. Al so llau van tar los otros tres finalistes asturianos, amás de los gaiteros gallegos y bretones. Faló con LES NOTICIES de la so carrera

-Fálenos de la so relación cola gaita.

-Nací' l 13 de marzu de 1986 y creo que pertenezo a una xeneración de gaiteros asturianos que ta tomando lo meyor de lo aportao hasta agora por munchos históricos y, tamién d' otros músicos mozos que yá parecen veteranos pol altu nivel que tienen. Llevo diez años dedicáu a esto y entamé a trabayar col maestru Eugenio Otero, director de la banda de gaites Llariegu, dos veces campeona d' Asturies. Participé con esta banda en munchos ensayos y estudié con ellos, anque nun llegué a participar activamente de los sos triunfos y actuaciones. Quedábame cerca de casa y gustábame, asina qu' escoyí dir a clase con ellos pa depués continuar con Chus Solís y más tarde col maestru Xuacu Amieva.

-Parecen estilos mui dispares pa fraguar una llinia personal como intérprete. ¿Considérase más gaiteru solista de que banda?

-Esfruto col instrumentu y col que pueda enseñame a meyorar. Desgraciadamente nun puedo dedica-y tantes hores al día como quixere por motivos d' estudios y de distancia, pero polo menos una hora al día nun me la quita naide. Pa esto necesítase constancia y ye algo que nun faigo por obligación sinón por gustu, como tantos otros compañeros de competición o diversión, qu' a veces bien a ser lo mesmo. Soi solista nos que se refier a presentase a competiciones y muestres, anque tamién me presta tar formando parte d' una banda y sentime útil nun grupu. Agora forma parte de la Banda de Gaites Rei Aurelio que dirixe Xuan Rodríguez, el gaiteru de Llan de Cubel y toi mui a gustu con estos compañeros. Alquierse muncha esperiencia compartiendo'l trabayu de banda y esto ye útil pa un intérprete solista.

-¿Hai dalgún gaiteru asturianu al que-y prestaría parecese? Un modelu a siguir...

-Siempre se diz q' un busca' l so propiu estilu y eso ye lo qu' intento. A mí sigue gustándome mirar al pasáu y creo que como Remis Ovalle nun esistió naide. A veces discuto colos amigos cuando escuchamos grabaciones que nos dexa xente como Javi "el d' Arroes", históricu de la nuestra tonada, y nes que se pue sentir al Gaiteru Mayor. Dalgunos dicen que los sos requintos o dalgunes de les sos interpretaciones parecíen desafinaes, pero yo creo que asine yeren nel so orixinal nun somos naide pa pone-yos pegues a ese interpretaciones. Creo que me prestaría contaxame d' esa fuerza y esa técnica úniques en Remis. Anguaño considero que José Manuel Tejedor ye un espeyu onde toos tenemos que miranos, almírolu muncho.

-¿Aspira como tantos otros gaiteros mozos a formar el so propiu grupu folk?

-Lo cierto ye que nunca me planteé esa posibilidá. Tengo dalgunos estudios de solféu y tuvi diendo a clases de música nuna academia de La Pola, pero lo del grupu folk, si me lo planteo dalguna vez, va llevar más tiempu. Agora acompaño a la gaita a dalgunos grupo de baille de Benia d' Onís, Campu Casu y Colunga y tamién me divierto con esta esperiencia. Hai otres prioridaes como la de seguir meyorando y estudiar por exemplu la música bretona y gallega pa poder competir esti añu en Lorient, yá que cada edición ye más dura.

-¿Fala dende la esperiencia de la competición a pesar de la so mocedá?

-Nun se si será casualidá pero esceptuando a Iñaki Santianes que l' añu pasáu tuvo en Nueva York con El Pravianu, los cuatro asturianos que competimos esti añu somos los mesmos finalistes, si esceptuamos tamién al tristemente desaparecíu Jairo. En Bretaña Jairo quedó en segundu llugar, tres el gallegu Bellón, y yo fui terceru. Esti añu tamién coincidiremos Marco Guardado y Ángel Domingo. Y anque nun ye que tenga un currículum estensu, yá que me preguntes pola esperiencia diréte qu' esti tercer puestu nel Macallan significó mucho pa mi, lo mesmo que los primeros puestos algamaos nel Concursu de Gaiteros Mozos del Carbayu y Lliberdón; el cuartu puestu nel Remis el pasáu añu o el tamién cuartu puestu de solista nel troféu Ciudá d' Uviéu. Tamién participo, col mio hermanu Carlos a la percusión, en dalgunes d' estes pruebes.